Հաստատվել է «Հեքիաթ Թունդայի մասին» անիմացիոն ֆիլմի արտադրության պետական ֆինանսավորումը
ԿԻՆՈՄԱՆՅԱԿ կինոընկերությունը հպարտությամբ տեղեկացնում է, որ իր առաջին նախագիծը՝ «Հեքիաթ Թունդայի մասին» կարճամետրաժ անիմացիոն ֆիլմը, ընտրվել է Հայաստանի Հանրապետության կրթության, գիտության, մշակույթի և սպորտի նախարարության Հայաստանի ազգային կինոկենտրոնի (ներկայում՝ Հայաստանի կինոյի հիմնադրամ) կողմից՝ արտադրության համար պետական ֆինանսավորում ստանալու նպատակով:
Ֆիլմի սցենարը գրել է «Սոյուզմուլտֆիլմ» կինոստուդիայի գլխավոր խմբագիր Սերգեյ Կապկովը։ Նախագծի ռեժիսորն է Վերոնիկա Ֆյոդորովան, ով հայտնի է «Անտառային փոքրիկ պատմություններ» ֆիլմի վրա իր աշխատանքով, իսկ ֆիլմի պրոդյուսերն է Սերգեյ Հովսեփյանը («Վանդակավոր Զեբրա»):
«Հեքիաթ Թունդայի մասին» անիմացիոն ֆիլմը հիմնված է Արցախի հերոս Ալեն Մարգարյանի «Բոլորիս Ալենի հեքիաթները» ժողովածուի հայկական հեքիաթի վրա: Այս նախագիծը ազգային մշակութային ժառանգության պահպանման և նոր սերնդին հայկական եզակի լեգենդներ փոխանցելու կարևոր մասն է:
Ֆիլմի թողարկումը նախատեսված է 2026 թվականին:
